மாணவர்கள் போராட்டங்கள் ஐந்து நாட்கள் கடந்து பின்னும் தளராமல் ஓடிக் கொண்டிருக்கிறது. மிகவும் தன்வயமான இந்த எழுச்சி உள் நோக்கத்துடன் சுயநல நோக்குடன் இருந்திருந்தால் எப்போதோ முடிவுக்கு வந்திருக்கும். ஏதாவது விலைக்கு ஒப்புக்கொண்டு இந்நேரம் கூடியிருக்கும் மக்கள் கலைந்திருப்பார்கள். அவர்கள் தளராமல் போராடிக் கொண்டிருப்பதிலிருந்தே மாணவர்களின் - மக்களின் - சுயநல அபிலாஷைஅற்ற பொது நோக்கு வெளிப்பட்டிருக்கிறது. அரசியல்வாதிகள் உள்ளிட்ட மொத்த இந்தியாவும் - ஏன்? - உலகமே இதை பிரமிப்புடன் கவனித்து வருகிறது. மகாத்மா காந்தி இதைத்தான் விரும்பினார். வன்முறையற்ற கட்டுப்பாடான அகிம்சைப் பேராட்டம் சுதந்திர இயக்கத்திற்குப் பிறகு இன்றுதான் முழுமையாக வெளிச்சத்திற்கு வந்திருக்கிறது. என்ன ஒழுக்கம்! என்ன ஒழுங்கு! என்ன கட்டுப்பாடு!
மறைந்த ஐ ஜி அருளை ஒருமுறை “அன்றைக்கும் இன்றைக்கும் என்ன வேறுபாடு?” என்று கேட்டபோது சொன்னார்... “அன்றைக்குப் பேராட்டத்தில் கடைசி ஆயுதம்தான் வன்முறை; இன்று போராட்டத்தில் அது தான் முதல் தகவல் தொடர்பு சாதனம்” இப்போது பேராட்டம் என்றால் நான்கு பஸ் எரிய வேண்டும்: பத்து பேர் சாகவேண்டும். பொதுச் சொத்துக்களை நாசப் படுத்தவேண்டும். கடைகளைச் சூறையாட வேண்டும். இவை அனைத்தையும் தவிர்த்து அகிம்சைப் போராட்டம் என்றால் என்ன என்று ஒரு புது அத்யாயத்தை எழுதியிருக்கிறார்கள் மாணவர்கள்.
இந்தப் போராட்டம் என்பது ஜல்லிக்கட்டு என்ற ஒரே விஷயத்தைப் பற்றி என்று நினைக்க முடியவில்லை. அரசியல்வாதிகளின் ஊழல்கள், பன்னாட்டு நிறுவனங்கள், மூன்றாம் உலக நாடுகளைக் கபளீகரம் செய்யும் போக்கு, வழிவழியாக நடந்து வந்த பாராம்பரிய பாசன முறைகள், மண்ணுக்கேற்ற பயிர்கள், உரங்கள், உயிரினங்கள் அவற்றைக் கொஞ்சம் கொஞ்சமாகக் காவு கொடுத்துக் கொண்டிருப்பது, அரசே நடத்தும் சாராயக் கடைகள், கட்டுமானங்கள் இல்லாமல் கிராமங்கள் சிதைந்து கொண்டிருப்பது இவையெல்லாமே திரண்டு வந்ததன் திரட்சியாகத்தான் இந்தப் போராட்டம் வெடித்திருக்கிறது எனலாம்.
பொதுவாக இதுபோன்ற போராட்டங்களின் தர்க்க முடிவு ஒன்றிருக்கிறது. இதில் கொஞ்சம் பேர் தலைவர்களாக எழுந்து நாட்டை ஆளும் உரிமை பெறுகிறவர்களாக இருப்பார்கள். அண்ணா ஹசாரே இயக்கத்தைக் கேஜரிவால் கபளீகரம் செய்த மாதிரி. ஆட்சி மாறும் பின்னர் எல்லாமே வழக்கம்போலதான் நடக்கும். ஒருமாற்றமும் இருக்காது. இதற்குக் காரணம் சுயநல நோக்கில் செயல்படுகின்ற சிலர் இதுபோன்ற இயக்கங்களை உபயோகித்துக் கொள்வது மட்டுமன்று. ஊழலைப் பொறுத்தமட்டில் பெருமளவு கவனிப்புப் பெறுகின்ற அரசியல்வாதிகள் போலல்லாது எப்போதும் மாறாமல் இருக்கின்ற அதிகார வர்க்கமும் கூடத்தான் - இந்த இயக்கங்களைப் பொறுத்தமட்டில் என்ன நடக்கின்றது என்பதைப் பொறுத்திருந்துதான் பார்க்க வேண்டும். நம் எதிர்பார்ப்பெல்லாம் அஸாம் கன பரிஷத்போல அது நீர்த்துப் போய் விடக்கூடாது என்பதே.
இவை ஒருபுறம் இருக்க, நம் மனதில் சில ஐயங்கள் எழுகின்றன:
1. மேகதாது அணையின் அடிப்படைக் கட்டுமானத்திற்கு நாமக்கல் மாவட்டத்திலிருந்து மணல் போயிருக்கிறது என்கிறார்கள். தவிர மணலை வெட்டி மைசூருக்கும் நாம் அனுப்பிக் கொண்டிருக்கிறோம் என்று சொல்கிறார்கள். கர்நாடகம் காவிரி நீரை இன்றுவரை மறுத்துக் கொண்டிருக்கிறது.
2. கேரளாவில் மருத்துவக் கழிவுகளை லாரிகளில் அள்ளிக் கொண்டு வந்து தமிழ்நாட்டில் கொட்டிவிட்டுப் போகிறார்கள். இதற்குப் பிரதிபலனாக நாம் என்ன செய்கிறோம் தெரியுமா? நம் மாடுகளை வண்டி வண்டியாக அவர்களுக்கு இறைச்சிக்காக அனுப்பிக் கொண்டிருக்கிறோம். அவர்களின் தினத் தேவையாக 8000 டன் இறைச்சியைப் பெருமளவு நம் மாடுகள்தாம் பூர்த்தி செய்கின்றன.
3. தெலுங்கு கங்கையின் நீர்வரத்துக்கு நாம் கோடி கோடியாகச் செலவு செய்தோம். அந்த வரத்து நீரை ராயலசீமாவின் பாசனத்திற்காக ஆந்திரர்கள் உபயோகப்படுத்திக் கொள்கிறார்கள். அதுபோய் கழிகள் கலந்த மிச்ச நீர்தான் நமக்குக் கிடைக்கிறது.
4. விவசாய நிலங்கள் வேகமாக மறைந்து வீடுகள் முளைக்கின்றன. நீர் ஆதாரங்களை முற்றிலுமாகச் சிதைத்திருக்கிறோம் - மேலும் சிதைத்து வருகிறோம். பெருமழை வரும்போது தங்குவதற்கான நீராதாரங்கள் சிதைந்து போய்வீடுகள் வெள்ளத்தில் மூழ்குகின்றன.
5. கவுன்ஸிலரிலிருந்து அமைச்சர் வரை அங்கிங்கனாதபடி எங்கும் விரவியிருக்கும் ஊழல் - ஆட்சி மாறினாலும் மாறாமல் கோலோச்சிக் கொண்டிருக்கும் ஊழலில் திளைத்துக் கொண்டிருக்கும் அதிகார வர்க்கம் -
இதுபோன்ற விஷயங்களுக்காகச் சேமிக்க வேண்டிய வெடி மருந்தை ஜல்லிக்கட்டு போன்ற சற்றுக் குறைவான முக்கியத்துவமுள்ள விஷயங்களால் நீர்வார்த்து நமுத்துப் போகச் செய்வானேன்?
அடுத்ததாக வழக்கு உச்ச நீதிமன்றத்திலிருக்கும்போது இந்தப் போராட்டத்தை ஆரம்பித்திருப்பது சரியான சமயத்தில்தானா என்று சந்தேகமாக இருக்கிறது. இந்த அவசரச் சட்டத்திற்கு எதிராக ஒரு வேளை உச்சநீதிமன்றம் தீர்ப்பளிக்குமானால் அதற்குண்டான சட்டத்திருத்தத்தை நிறைவேற்றப் பாராளுமன்றம் சம்மதிக்கும் என்று எதிர் பார்க்கலாமென்றாலும் உச்சநீதிமன்றத் தீர்ப்பை உதாசீனம் செய்வது உசிதம்தானா? இப்போதே உச்சநீதிமன்றத் தற்காலிகத் தடை அல்லது வழக்கினால் நாம் நம் உரிமையை நிலைநாட்டும் போராட்டத்தில் ஈடுபட இதனாலேயே காவிரி விஷயத்தில் உச்ச நீதிமன்றத் தீர்ப்பை உதாசீனம் செய்யும் கர்நாடகத்தை வற்புறுத்துவதன் தார்மீக உரிமையை நாம் இழந்து விட்டோம் என்று சிலர் கூறும் சந்தர்ப்பத்தை நாமே ஏற்படுத்திக் கொடுப்பானேன்?
அடுத்ததாகத் தமிழன் என்று ‘போலரைஸ்’ செய்வது உசிதமா? இது எதிர்மறையான விளைவுகளைச் சில சமயம் ஏற்படுத்தி விடுகிறது. உதாரணத்திற்குச் சொல்ல நிறைய இருக்கின்றன. தமிழ்மொழி மற்ற திராவிட மொழிகளுக்கான ஆணிவேர். இதை நாம் உரத்துச் சொல்லச் சொல்ல மற்ற தென் மாநிலங்கள் நம்மிடமிருந்து விலகிச் செல்கிறார்கள். காரணம் வட இந்திய மொழிகளின் வேராக சமஸ்கிருதத்தை அவர்கள் உணர்ந்த போதும், தமிழ் திராவிட மொழிகள் மத்தியில் இன்றுவரை அந்த அந்தஸ்த்தைப் பெறவில்லை. காரணம் வட மொழிகள் சமஸ்கிருத இலக்கண நூலான அஷ்டஅத்யாயியைப் பின்பற்றுவதுதான். தமிழ் தவிர்த்த ஏனைய திராவிட மொழிகளும் தொல்காப்பியத்தைப் பின்பற்றாது அஷ்ட அத்யாயியையே பின்பற்றகின்றன. சமஸ்கிருதத்திலிருந்து பாலி , பாலியிலிருந்து பிராகிருதம் அதிலிருந்து தமிழ் சேர்ந்தது கன்னடம், மலையாளத்தின் 40% சமஸ்க்ருதம் - கன்னடர்கள் நம் தொன்மையான யட்சகானத்தை உயிர்ப்பித்திருக்கிறார்கள். மலையாளிகள் நம் தொன்மமான கதகளியை அப்படியே பேணுகிறார்கள். நாம் எந்தத் தொன்மத்தைப் பேணுகிறோம்? ஜல்லிக்கட்டுக்கு மட்டும் கிளர்ந்து எழும் நம் தமிழ் உணர்வு திராவிட மொழிகளுக்கு எல்லாம் தொன்மையானது நம் தமிழ் என்பதை நிரூபிக்க முடியவில்லை. இதனாலேயே தனிச் செம்மொழி அந்தஸ்து நம் மொழி பெறாது, மற்ற மொழிளுடன் அதைப் பெற்றது.
‘போலரைஸ்’ செய்வதில் இன்னொரு ஆபத்தும் உண்டு. பீட்டா நிதி உதவி வெளிநாட்டிலிருந்து பெறுகிறது என்கிற குற்றச்சாட்டு எழுந்துள்ளது. அது உண்மையாகவும் இருக்கலாம். இதுபோன்ற பல போராட்ட இயக்கங்களை அமெரிக்கா போன்ற தேசங்கள் ஊக்குவிப்பதாகப் பேச்சு. இந்தப் பட்டியலில் சில இடதுசாரி இயக்கங்களும் அடக்கம். இதே போன்றதொரு குற்றச்சாட்டை பீட்டாவின் மேல் வைப்பது போல் இந்த இயக்கத்தை முன்னெடுத்தவர்கள் மீது மற்றவர் வைக்க வாய்ப்பு உண்டு என்பதை மறுக்கவியலாது. தவிர, மாணவர்கள் இதுபோன்ற பேராட்டங்களின் ஈடுபடுவது உசிதமா? கூட்டத்தப் பார்த்து உணர்ச்சிவசப்படுகின்ற எல்லோருமே மாணவர்களின் நடவடிக்கை சரிதான் என்கிறார்கள் - இருக்கலாம் - ஆனால் மாணவர்களின் வேலை படிப்பதுதான் இதுவல்ல என்று தோன்றுகிறது.
தற்போது அவசரச் சட்டம் பிறப்பிக்கப்பட்டு ஜல்லிக்கட்டு ஒன்றிரண்டு இடங்களில் நடந்து வருகிறது. இதை இத்துடன் முடித்துக் கொள்வதுதான் மாணவர்களுக்கு நல்லது.
ரயில் மறியல்களை விமர்சித்து ஆங்காங்கே விமர்சனக் குரல்கள் எழுந்து வருகின்றன. இவை வலுப்பெறுமுன் மாணவர்கள் போராட்டத்தை விலக்கிக் கொள்வது நலம்.
எது எப்படி இருப்பினும் பம்மாத்து பண்ணிக் கொண்டிருந்த அரசியல்வாதிகளை ஆட்டங்காண வைத்திருக்கிறார்கள் மாணவர்கள். அந்த விதத்தில் அவர்களின் இமாலயச் சாதனை குறிப்பிட்டு பாராட்டப்பட வேண்டியதே
